Xocalı yarımstansiyası yeni nəsil rəqəmsal texnologiyalar və idarəetmə avadanlıqları ilə təchiz edilib və Rəqəmsal İdarəetmə Mərkəzi Xocalı rayonunda yerləşən yeni yaşayış kompleksləri, kənd təsərrüfatı və turizm obyektləri, eləcə də sosial-iqtisadi təyinatlı müxtəlif infrastrukturun dayanıqlı, etibarlı və fasiləsiz elektrik enerjisi təminatını həyata keçirmək məqsədi daşıyır. Qarabağ Regional Enerji Təchizatı və Satışı İdarəsinin Baş mühəndisi Mübariz Zərbəliyev bildirib ki, yarımstansiyanın elektrik təchizatı üçün “Xankəndi-1” və “Əsgəran” yarımstansiyalarından elektrik verilişi xətləri çəkilib. Bu, Ağdam-Əsgəran-Xocalı-Xankəndi şəhərləri arasında dairəvi elektrik təchizatı sxemi yaradılacaq deməkdir. Rəqəmsal İdarəetmə Mərkəzi vasitəsilə şəbəkələrin cari vəziyyəti toplanılır və emal olunur, avadanlıqlar məsafədən idarə edilir və monitorinqi rəqəmsal sistemlər vasitəsilə həyata keçirilir.
Əhəmiyyətli olan məsələ budur ki, Rəqəmsal İdarəetmə Mərkəzi şəbəkənin etibarlı istismarını dəstəkləməklə yanaşı, elektrik enerjisinin ötürülməsi zamanı itkilərin və ümumi istismar xərclərinin azaldılmasına da şərait yaradır. Yarımstansiyadan qidalanan istehlakçılara elektrik enerjisi verilişində yaranan fasilələr barədə Mərkəz vasitəsilə real vaxt rejimində əvvəlcədən məlumat ötürülmə imkanı yaradılıb. Bərpaolunan enerji mənbələrinin elektrik şəbəkələrinə inteqrasiyası prosesi Rəqəmsal İdarəetmə Mərkəzi tərəfindən mərkəzləşdirilmiş şəkildə idarə olunduğundan enerji təchizatında fasilələrin yaranma riski minimuma endirilib. Mərkəz alınan və ötürülən elektrik enerjisinin miqdarına görə yarımstansiyanın işinin multifunksional rejimdə qurulmasını, cihaz və avadanlıqların bir-biri ilə koordinasiyasını tam təmin edir. Günəş panelləri də quraşdırılan Rəqəmsal İdarəetmə Mərkəzində istehsal olunan enerjinin şəbəkəyə ötürülməsi təmin edilib və elektromobillər üçün sürətli enerjidoldurma cihazları da yerləşdirilib.
Prezident İlham Əliyev mayın 9-da “Azərişıq” Açıq Səhmdar Cəmiyyətinin “Xocalı” yarımstansiyasının və Rəqəmsal İdarəetmə Mərkəzinin açılışında iştirak edib. Bu da göstərir ki, ölkəmizdə infrastruktur sahəsində daim inkişaf və yeniliklər olacaq.
