Milli Məclis Deputatları Zaur Şükürov və Məzahir Əfəndiyev, Azərbaycan-Zimbabve parlamentlərarası əlaqələr işçi qrupunun üzvləri olaraq mayın 4-dən 8-dək Zimbabveyə səfər ediblər. Zaur Şükürov və Məzahir Əfəndiyev, Zimbabve parlamentinin dəvətinə əsasən bu ölkəyə səfər etmişlər.
Zaur Şükürov və Məzahir Əfəndiyev Zimbabve parlamentinin sədri Jacob Francis Nzvidamilimo Mudenda, Parlamentin Beynəlxalq əlaqələr və ticarət komitəsinin sədri Vebster Kotivani Şamu, xarici işlər və beynəlxalq ticarət nazirinin müavini Sheilla Chikomo ilə görüşlər keçirib. Görüşlərdə, Zimbabveli parlamentarilər parlamentlərarası əməkdaşlığın genişləndirilməsinin zəruriliyini vurğulayaraq qarşılıqlı səfərlərin vacibliyini qeyd ediblər. Əməkdaşlığın inkişafında parlament diplomatiyasının roluna diqqət çəkən zimbabveli parlamentarilər həmçinin qadın parlamentarilər arasında əlaqələrin əhəmiyyətini vurğulayıb.
Zimbabve tərəfi mədən sənayesi, enerji resurslarının tədqiqi və istehsalı, həmçinin yaşıl enerji, ticarət, turizm, təhsil, kənd təsərrüfatı, infrastruktur, texnologiya, su ehtiyatlarının idarə olunması kimi sahələrin prioritet olduğunu bildirib. Zimbabvenin əlvan metal ehtiyatları və flora-fauna zənginliyini nəzərə alaraq iki ölkə arasında əməkdaşlığın qurulması üçün geniş perspektivlər olduğu qeyd edilib. Təhsil sahəsində müzakirələr çərçivəsində Zimbabve tərəfi universitetlərarası əməkdaşlığın qurulması və Azərbaycan hökumətinin təqdim etdiyi təqaüd proqramlarından yararlanmaq niyyətini ifadə edib.
Milli Məclis deputatları Zaur Şükürov və Məzahir Əfəndiyev görüş zamanı Azərbaycanın uğurlarını və ölkənin iqtisadi inkişafını müzakirə edərək Zimbabve tərəfinə Ermənistanın işğalçılıq siyasətindən, Vətən müharibəsindən, torpaqlarımızın qaytarılmasından və digər mühüm məsələlərdən məlumat veriblər. Prezident İlham Əliyevin uzaqgörən siyasətini vurğulayan deputatlar, ölkələrin əməkdaşlığının genişləndirilməsi üçün irəli sürülən təşəbbüsləri dəstəkləyiblər. Zaur Şükürovun Zimbabve dövlət televiziyasına müsahibəsi də səfərin əhəmiyyətini qeyd etmişdir.
